مراد علی
قومی اسمبلی کی قادیانی ڈیبیٹ میں سب سے پہلی طویل بحث قادیانیوں کے اس موقف پر ہوئی کہ ریاست یا کوئی فرد کسی کو غیر مسلم قرار نہیں دے سکتا۔
غامدی صاحب کا موقف بھی یہی ہے، فرق یہ ہے کہ قادیانی اتمامِ حجت وغیرہ کے بجائے اسے ایک انسانی حق سمجھتے ہیں کہ اگر کوئی خود کو مسلمان کہتا ہو تو کسی کو حق نہیں کہ اسے غیر مسلم قرار دے۔
یحیی بختیار سوال اٹھاتے ہیں کہ اگر کوئی نماز، زکوٰۃ اور حج وغیرہ جیسے ارکان اسلام کی فرضیت کا انکار کردے تو اسے غیر مسلم قرار دیا جاسکتا ہے؟
مرزا ناصر اس سوال کا واضح جواب دینے کے بجائے بات کو گھماتے ہیں، اس گھماؤ پھراؤ پر درجنوں صفحات کی بحث ہے۔
مرزا ناصر مذہبی پیشوا کے طور پر گھمانے کا ہنر جانتا ہے اور بات میں ٹوسٹ پیدا کرنا بھی۔
لیکن ایک اچھے قانون دان کے سامنے ہیر پھیر کب زیادہ دیر چل سکتا ہے!
یحیی بختیار ایسے سوالات فریم کرتے ہیں کہ اس سے فرار کا کوئی راستہ ممکن نہیں ہوتا، اس عمل میں وقت اگرچہ زیادہ صرف ہوا، لیکن یحیی بخیتار بالآخر کامیاب ہو ہی جاتے ہیں (وہ قومی اسمبلی کے ارکان اور بالخصوص علما کو بار بار یہی کہتے ہیں کہ جلد بازی سے کام نہ لیں)۔
فقہ اور قانون کے سامنے حرفیت پسندی ہمیشہ ماند پڑ گئی ہے۔ غامدی صاحب بھی بنیادی طور پر حرفیت پسند ہیں اور انھیں کبھی اس قسم کے سوالات کا براہ راست سامنا نہیں ہوا ورنہ ایک اچھا قانون دان بہت کم وقت میں انھیں ان کے مخالف فکری نتائج تک پہنچا سکتا ہے۔